Kuiergaste voor Kersfees

Die afgelope drie dae het drie verskillende geveerdes hul opwagting in ons erf gemaak. 'n Kwêvoël, janfrederik en 'n lyster. Elkeen met sy eie unieke persoonlikheid en maniere. Die Kwê het 'n paar vriende saamgebring en hulle het hulself tuisgemaak op die vygie en aan die dooie, droë blommetjies begin kou.

Hulle was baie woelig en ek het my verwonder aan hul amper "vraatsige" maniere!

Janfrederik is natuurlik my gunsteling der gunstelinge en ek het myself al wysgemaak dat 'n dag net liefliker as gewoonlik gaan wees as ek vir janfrederik iewers te siene kry! Kyk net hoe pronkerig stap hy hier rond op soek na lekker vet wurmpies in die grond.

Ek het al baie keer gehoor die kraaie gaap so warm is dit. Wel, vandag het ek gesien hoe 'n lyster gaap. Dis 38 grade en die son vat dooierus. Nie 'n teken van reën nie. Geen wonder ou geelbeklystertjie sit en gaap so gesellig hier op die muur nie!
Miskien is dit juis 'n teken dat heerlike reëns op pad is, wie weet? Nietemin, die verskillende voëls wat ons daagliks besoek, verskaf ure en ure se kykgenot op hierdie snikhete somersdae.
En ons sê dankie daarvoor!

Voëls in ons tuin

Om die geveerdes dop te hou, 'n nuwe kuiergas elke nou en dan te sien, 'n gelukskoot-foto te kan neem wat mooi duidelik uitkom en om dan bàie meer te wete te kom van dié besoeker, dit is pure plesier! En dit het die afgelope jaar in 'n heerlike stokperdjie ontaard waaroor ek net dankbaar kan wees.

 Nou anderdag sien ek vir die eerste maal sedert ons hier woon 'n koningrooibekkie. Wat 'n lieflike ou dingetjie is dit nie! Later sien ek nog een, die nie-broeiende mannetjie. Hy verskil van bg. broeiende mannetjie in heelwat opsigte:

’n Broeiende mannetjie is onmiskenbaar; hy is swart aan die bokant met ’n wit agternek en onderste dele, ’n rooi snawel en verlengde stertvere. As die broeiseisoen verby is, begin hy nes sy wyfie lyk: bo-op dofgeel, onder ligkleurig en met ’n duidelik gestreepte swart-en-dofgeel kop. 

Jy kan die mannetjie en wyfie egter onderskei deur na die snawel te kyk; die mannetjie se snawel is rooi en die wyfie s’n is bruin. Onvolwassenes is ’n effekleurige bruin. Koningrooibekkies is aggressiewe voëls wat ander spesies wegjaag by voerplekke. Hulle vreet hoofsaaklike sade, maar sal ook insekte vreet, en bly in grasveld, savanne, struikgewasse, tuine en parke. (Wikipedia) 

Ek voel uiters bevoorreg dat ek beide dié mannetjies hier in ons tuin kon raaksien. Ek wonder waar die wyfie is en of hulle dalk 'n nes naby het. 

Hierdie is 'n dikbekwewer. 'n Mooi voël wat ook nog selde in ons tuin gesien is. Die mannetjie is sjokoladebruin, het 'n wit vlaggie op die vlerk en 'n wit kol op sy voorkop. Sy nes lyk amper soos dié van 'n geelvink. Dit is immers familie van hom.

Rooivink. Maklik om raak te sien. So 'n helderrooi jassie is tog te pragtig. Kleinerig. Swart pens en swart gesigmasker.  Onder is 'n jonger vink. Hulle word later heeltemal rooi met 'n swart kop.

Onder: Paradysvlieëvanger, 'n wyfie. Die mannetjie het twee lang stertvere. Dis presies die tweede keer dat ek dié pragtige voël in ons tuin gewaar.Wat 'n groot voorreg is dit nie! Die eerste keer het ek selfs 'n vers daaroor geskryf: 

Vere

Op ‘n dag soos vandag

kom speel paradysvlieëvanger 

wegkruipertjie tussen groen blare 

langs my slaapkamervenster -

sy stert hang lang oranje linte,

swiepswaai tussen die takke

soos hy vlieg en draai

en sy helder liedjie sing

wat warm vreugdes bring

op ‘n dag soos vandag

Elizabeth Kendall ©

Kuiergaste

Vandag was 'n warm dag. Selfs kwikstertjie het 'n oomblik by die waterbak kom sit. Tortelduif was omtrent in droomland, sy het heerlik weggedommel in die laat middagson. En lyster met sy geel snawel het ook kom kuier!
Kyk hoe mooi.....almal met hul grys klere aan!

Ons mossies

Ja ons s'n! Hulle nes is reg bokant ons koppe as ons 'n tydjie maak om in die koelte langs die rondawel te gaan sit en ontspan en oor die dag se gebeure gesels. Ons mossies. 'n Mannetjie en 'n wyfie. Lieflik. 

 Hier is die wyfie met 'n happie in die snawel. 

Die nes is klaar, nou is dit tyd om eiers te lê en te broei. Sommer net hier naby. 

Net 'n mossie

'n Klein en baie bekende bondeltjie vere. 'n Mossie. 'n Valetjie, 'n wyfie. So mooi. So eenvoudig. So uniek. Sy kom sit op die tuinbruggie se reling 'n paar treë van my af. Dis eers toe ek die foto op my rekenaar aflaai dat ek die wurm in haar bekkie sien. Ek sou my hande bakhand om haar wou vou, ek sou haar sagte koppie wou streel. Ek kyk na die foto met groot waardering. Ek skryf 'n paar sinne op my blog. Ek bou vir my mossiewyfie 'n monument. 'n Prentjie vol hoop. 

Somer- en sonskynstories

Dis warm. Die voëls weet dit. Die honde weet dit. Ons weet dit. Dis somer in Suid-Afrika. 'n Hittegolf met temperature van 32 grade en meer tref die binneland. Almal snak na asem en soek maniere om af te koel. Toe ek na buite kyk vanoggend, sien ek hoe hierdie tortelduifie dooierus in die waterbak vat. 'n Geluksalige uitdrukking in die ogies.  Ek was sommer lus om haar te gaan geselskap hou! 

Die rooikophoutkapper wat altyd nogal skugter is om te naby aan ons te kom, het ewe kordaat kom water soek in die honde se drinkbak, 'n paar treë vanwaar ons gesit en hom dopgehou het.  

Gelukkig was ek betyds om 'n foto te kon neem. Ek verwonder my altyd aan sy sterk, dik snawel. Met hierdie snawel kan die rooikophoutkapper nie alleen die vrugte waarvoor hy lief is, uitmekaar skeur nie, maar selfs ook neute kraak. 

Nie te lank nadat die mooie rooikophoutkapper weggevlieg het nie, het tortelduif weer haar verskyning gemaak. Die water was heerlik. Kyk hoe tap dit teen haar krop af. Ek kon nie help om aan die woorde te dink wat ek iewers op die internet gelees het nie:  As gevolg van die ongewone geluid van die voëls se roep in die bos word daar gesê dat die roep van die duif in die oggend is: "werk haaarder, werk haaarder", en in die aand sê die roep: "drink laaager, drink laaager."

Janfredrik, mossies en nog meer besoekers

Elke dag bring sy eie verrassings. Ons kuiergaste oor die naweek het gewissel van uiters gewild tot minder geliefd. 

 Ons vorder! Janfrederik sit nog nie op my sitkamerbank nie, maar hy vlieg nie meer weg as ek 'n paar treë van hom af staan nie. Sy meelwurms lê en wag op die plankie, 'n spesiale bederf-dis waarmee ek hom nader lok. Mooiste ou voëltjie in die tuin. Verseker. 

 Mossie maar man! 'n Bondeltjie vere wat heeldag lank vrolike wysies fluit. 

 Rooivlerkspreeu is ook deesdae 'n gereelde besoeker. Heelbo op die rondawel se dak maak hy hom tuis en bekyk die wêreld vandaar. 

 Die Rooivlerkspreeu

O rooivlerkspreeu,

ek hoor jou lied,

‘n diep verhaal

van warm verdriet...

Ek hoor jou klae,

jou stemklank soos in kinderdae,

en soek dan hier,

dan daar,

tot ek jou op die tak gewaar,

allenig op die eiketak,

so somber-swart,

so windverward!

Die reënbui en die winterkou...

die berg is toe van wolkegrou,

die stormweer smoor

jou klagte dood:

bo in die berg is hongersnood.

Die donker kom,

die stormwind fluit-

my hart herhaal

‘n honderd maal

die smeking van jou stemgeluid!

O rooivlerkspreeu,

so somber-swart,

so noodverward,

ek hoor jou in die noordewind.

O bedelaar-kind,

verstom, verkluim,

in raaisel-dom

van kouer, wrede

wêreldruim!

D.F. Malherbe. 

 Dis nie net Janfrederik wat van 'n stukkie kaas hou nie, kyk hoe gelukkig lyk mossievroutjie met haar vonds! 

Die Indiese spreeu of Common Myna. (Engels) Nie die gewildste voël op aarde nie. Die rede? Navorsing en menige ooggetuies vertel van Indiese spreeus wat inheemse voëlspesies  aanval en selfs hul eiers uit hul neste gooi.

Gunsteling der gunstelinge

As ek gedwing sou word om te kies, sou ek heel waarskynlik die glasogie as my gunsteling geveerde vriendjie kies. Elke keer as ek een of meer van hulle by die waterbak in ons tuin of elders gewaar, bons my hart sommer van pure blydskap. Met hul klein lyfies (10-12 cm. en gewig 8-12 gram) en wit kringetjie  (wat uit kort veertjies bestaan) om die wakker ogies, hul konstante kwetterende roep en vrolike, lewendige wip-wip van tak na tak, kruip hulle sommer diep in enige voëlliefhebber se hart. Dis eintlik 'n Kaapse glasogie (Cape white-eye), maar daar is heelwat streekname vir dié klein voëltjie: meelogie, kersogie, ringogie en piet-la-pok. (ek vermoed lg. is 'n troetelnaam)

Van die nagenoeg 95 soorte glasogies wat in Afrika, Madagaskar, Asië, Japan en die eilande in Indonesië, Filippyne en Maleisië tot in Australië voorkom, is daar slegs drie soorte teenwoordig in Suider-Afrika. Die Kaapse en Gariep-glasogie is beperk tot Suid-Afrika en die suidelike dele van Namibië, terwyl die geel glasogie in Noord KwaZulu Natal, Zimbabwe, die Caprivi en die noordelike dele van Botswana voorkom. (Volksblad)

Mossies

'n Mossie is een van die geveerdes waaroor niemand juis baie opgewonde raak nie. En tog. Gister sit ons heerlik buite en ontspan nà 'n besige dag. 'n Jong wyfie mossie kom sit op die bruggie naby ons en tjirp-tjirp vrolik. Net 'n bondeltjie vere. Ek neem foto's, een na die ander. Sy geniet die fotosessie, pure voëltjievrou! 

'n Sappige wurm in die snawel. "Kyk wat het ek!" tjirp sy.
Mossies is klein voëltjies met vaal en bruin vere. Die wyfie lê vier tot ses eiers wat ongeveer twee weke neem om uit te broei. 

In die Bybel lees ons in Mattheus 10:29 Word twee mossies nie vir ’n stuiwer verkoop nie? En nie een van hulle sal op die aarde val sonder die wil van julle Vader nie. 

'n Troosryke boodskap. 

'n Pragtige voëltjie. 

Kom ons teken!

 Geelvink

Gevlekte ooruil

 Piet-my-vrou

Tarentaal

Op RedBubble is 'n verskeidenheid sketse asook 'n hele aantal artikels beskikbaar. Kom maak 'n draai!

Die kwikstertjie

Toe ek 'n kind was, het ek iemand hoor sê 'n mens moet sout op sy stert gooi, dan sal jy hom kan vang. "Alles tevergeefs!" sê die Prediker. Ek het nooit eers probeer nie. Wat ek wel gedoen het, is om hierdie vrolike voëltjies te bekyk, geniet en te waardeer. En ek doen dit steeds. As ek sy lang, bekende fluit iewers in die tuin hoor, maak ek tyd om te gaan kyk. Te kyk hoe hy staan as hy gaan en hoe hy gaan as hy staan. Pragtig klein met 'n rugkant dof olyfgrys, onderkant naaswit met 'n swarterige borsband. Sy wenkbrou, buitestertvere en rande van vlerkvere witterig - die gewone kwikkie of "Cape wagtail" in Engels. 

 Nog name: kwikkie, wipstertjie of akkermannetjie. 

Die naam "kwikstert" kom van Nederlands: kwik-lewendig en staart-stert. Dié voëltjie se stertjies is baie beweeglik en wip voortdurend op en af. 

Hierdie bont kwikkie het ek by Ou Meulstroom, naby Bronkhorstspruit gesien. Sekerlik oppad om te gaan nesmaak! 

'n Asgrys loerie

'n Kwêvoël word meestal met die Bosveld geassosieer. Tog sien ons heel dikwels een of meer van hulle hier in die dorp en ag ek my gelukkig as hulle in ons erf kom water drink en vir 'n wyle stilsit. In Engels is sy naam: Grey Go-away bird, heelwaarskynlik na aanleiding van sy roep wat klink na "go away!" 
By Weesgerus, naby Nylstroom, sien mens baie van hulle en hoor mens kort-kort die kenmerkende "kwê!" tussen die bome deur. Hulle eet graag vrugte, sade, insekte en is ook lief vir 'n stukkie brood wat as lokaas aangebied word.
Nie so kleurvol soos die res van die loerie familie nie en tog ook mooi op sy eie manier.

 Laatmiddag se kuiertjie by die waterbak. Kyk hoe blink die druppel aan sy snawel. 

Tiptol

As 'n tiptol kom kuier is ek sommer dadelik bly. Nie net klink hul naam soos iets ver-bo-dese-aardse-smarte nie, hul liedjies en voorkoms is uiters sag op oor en oog. "Pietpietpetaata!" sing hy vanuit die appelkoosboom hier bokant my. Hulle eet graag vrugte en insekte. Hul goudgeel onderstertdekvere is kenmerkend. Vandaar ook sy mooi, beskrywende  Afrikaanse naam: bottergat. Hierdie een is die swartoog tiptol met sy donker kop en klein kuifie. Drie tiptolfamilies nl. rooioog-, rooibek- en Kaapse tiptolle kom oral in Afrika voor. Hulle word hoofsaaklik aan hul oë uitgeken. 

 "Klaaskluitjiekorrel" is ook een van tiptol se name. 

Hallo Houtkappers !

Ek wag en wag. Nie soos in sit en niksdoen nie, maar net geduldig wag. Elke dag. In my gedagtes wag ek. Ek hoor hom iewers bokant my kop. Sy kenmerkende roep is musiek in my ore. Maar ek sien hom net nooit. Die hele winter gaan verby. Sy naamgenoot met die rooikop nl. rooikophoutkapper, kom kuier gereeld, byna elke dag. Ek kom agter dat lg. baie lief is vir vrugte en hy "steel" ook graag die janfrederik se meelwurms.

 Tog gee hy soveel kleur aan die vaal wintertuin.

 

 

My geduld word beloon. Uiteindelik! Op die heiningpaaltjies, toe die helder sonstrale op hul skerpste op Moederaarde skyn, kom sit my lankverwagte geveerde vriend vir 'n paar sekondes. Is hy nie pragtig nie?

 

 

Die Kuifkophoutkapper (Trachyphonus vaillantii) is 'n voël wat aan die familie van Afrika-houtkappers (Lybiidae) behoort. Hulle kom in oop savannes in Afrika suid van die Sahara voor. In Engels staan die spesie as die Crested Barbet bekend. Die spesie kan maklik aan hul dik snawel en kleurvolle vere uitgeken word. Hierdie klein voëltjie het 'n geel en rooi gesig met 'n klein swart kuifie. Die pens is geel met rooi spikkels, die vlerke is swart met wit spikkels en dit het 'n breë swart band op die nek. (Wikipedia)

Kuns: Voëls

Om voëls en ander geveerdes te skets of teken is altyd 'n uitdaging. Ek wil probeer om die wonder van hul kleure, grootte en vorm oor te dra in my sketse en skilderwerk. Elkeen is uniek. Elkeen is wonderlik. Die natuur se skoonheid is ver verhewe bo enige-iets mensgemaak. Mag my werk vir jou ook vreugde verskaf !
                                         Hen en haan en hul kroos

Kom kuier op Redbubble as jy meer wil sien!

 Hoe maklik en lekker is dit nie om 'n kuiken te teken nie! Hierbo is 'n gawe voorbeeld van kinderkuns.

Hierdie kuiken- prentjie het baie genot verskaf: die lyne is met Bostikgom getrek en aan die brand gesteek. Kinders geniet dit baie! En die eindresultaat is iets uniek.

 Lees meer oor hoe om dit te doen op my blog: Kreatiewe Joernaal. Geniet!

Twee rooiborsduifies in my voortuin, rustig op die stomp. Olieverf gedoen nàdat ek 'n foto van hulle geneem het. Op RedBubble kan verskeie produkte van bg. skildery gekoop word.

Ek het ook 'n skildery in waterverf (gouache) gedoen van dieselfde foto. Hier is talle rooiborduiwe in ons tuin. Hul sagte koergeluide is deel van ons elke-dag-lewe. So gerusstellend. Klik op dié skakel as jy na beskikbare produkte wil loer: RedBubble